Nasikop sa kapulisan ang 10 ka indibidwal sa sunod-sunod nga drug buy-bust operations sa lain-laing lugar sa probinsya sa Bukidnon niadtong milabayng adlaw, nga misangpot sa pagkasakmit sa kapin 47 gramos nga gituohang shabu nga mokabat sa kapin P328,000.
Sa mga operasyon, nasakmit sa kapulisan ang nagkadaiyang gidaghanon sa gituohang shabu lakip na ang kapin 12.1 gramos sa Valencia City, 10 gramos sa Maramag, 10.074 gramos sa Malaybalay City, 6.6 gramos ug 6.3 gramos usab sa duha ka operasyon sa Valencia City, samtang mas gagmay nga kantidad usab ang narekober sa Pangantucan, Kibawe ug Baungon.
Narekober usab sa mga operatiba ang buy-bust money, mga cellphone, motorsiklo ug usa ka .38 caliber nga pusil nga walay tukmang papeles.
Gipadayag sa kapulisan nga giandam na ang mga kaso batok sa mga nadakpan. Ang mga nadakpan gidala sa tagsa-tagsa ka police stations alang sa hustong disposasyon.