Mukabat sa kapin P1 milyon ang kantidad sa gituohang shabu ang nasakmit sa mga otoridad sa duha ka managlahing operasyon batok sa ilegal nga droga sa Kalilangan, Bukidnon niadtong Marso 20 ug 21, tuig 2026.
Ang unang operasyon nahitabo sa Kalilangan Public Market nga miresulta sa pagkasikop sa usa ka suspek nga nailhang si alyas Mohammad. Nakuha gikan kaniya ang gibanabanaang 100 gramos nga shabu nga nagkantidad og kapin P680,000.
Samtang sa laing bahin sa operasyon sa Barangay Macaopao, duha pa ka lalaki ang nadakpan diin nakuha ang 48 gramos nga shabu nga gibana-banaang nagkantidad og P326,400. Sa kinatibuk-an, niabot sa 148 gramos ang nasakmit nga ilegal nga droga nga adunay kantidad nga labaw sa P1 milyon.
Ang mga nadakpan gidala sa kustodiya sa PDEA Region 10 samtang ang mga ebidensya ipailawom sa laboratory examination. Gipasaka na usab ang kaso batok sa mga suspek tungod sa paglapas sa Republic Act 9165 o Comprehensive Dangerous Drugs Act of 2002.