Mokabat sa kapin kun kulang P62,500 nga structural damage human masunog ang usa ka citronella oil production building sa Zone 4, Sitio Kisumbing, Barangay Impalutao, Impasug-ong, Bukidnon bandang 12:30 sa udto.
Sa pakighinabi sa Bombo Radyo Malaybalay Bukidnon kay SFO1 Francis G. Talipan, Fire Arson Investigator sa BFP Impasug-ong, nadawat sa ilang himpilan ang alarma sa maong oras ug misirit dayon ang firefighting team bandang 12:31 sa udto aron respondehan ang insidente.
Gibutyag niya nga gama sa kahoy ug light materials ang nasunog nga building nga may gibanabanang 200 ngadto 250 square meters nga floor area, samtang usa sa ginasuta nga posibleng hinungdan sa sunog mao ang mga nakastock nga laya nga citronella fiber nga gigamit sa produksyon sa citronella oil.
Sa maong giingong adunay mga bata nga nagdula sulod sa maong estruktura sa wala pa ang sunog, padayon pang ginasusi sa BFP ang maong impormasyon tungod kay wala pa’y saksi nga mipirma og affidavit aron makakumpirma niini.
Wala’y natalang nasamdan o nadamay nga kasikbit nga mga balay sa insidente, samtang padayon pa ang imbestigasyon sa BFP aron matino ang tinuod nga hinungdan sa sunog ug gilauman nga mugawas ang final report sulod sa 30 ngadto 45 ka adlaw.