Giila ang Bukidnon nga usa sa lalawigan nga dunay dakong produksyon sa humay ug mga utanon diin gitutokan usab sa gobyerno ang pagpalambo sa transportasyon niini.
Sa pakighinabi sa Bombo Radyo Malaybalay kang Director Jose Apollo Pacamalan, Regional Executive Director sa Department of Agriculture X, gibutyag niini nga sa Northern Mindanao, ang probinsya ang adunay pinakadako nga regular nga programa alang sa farm-to-market road nga nagkantidad sa kapin kon kulang P500 milyones.
Kini gitumong aron makatagamtam ang mga mag-uuma sa accessibility, paspas, ug dili na maglisod sa pagbyahe sa ilang produkto ngadto sa kamerkadohan.
Sa laing bahin, gipaniguro sa Department of Agriculture sa region 10 nga dunay igong buffer stock ang tibuok Northern Mindanao panahon sa katalagman. Matud ni Director Pacamalan, nga naapod-apod na ang mga binhi sa humay sa matag municipal agriculture’s office.
Gibutyag usab niini nga adunay nilibo nga buffer stock sa humay ug mais.
Dugang pa ni Pacamalan, nga dunay report usab nga mga nadamyos sa agrikultura sa syudad sa Valencia, Kitaotao, Dangcagan, ug uban pang mga lugar tungod sa nasinati nga daot nga lakat sa panahon ug gisiguro nga masuta kini aron maaksyonan.