Gaatubang og dakong kabalaka ang mga residente sa Valencia City, Bukidnon nga grabeng naapektuhan sa bag-ong nahitabong pagbaha, hilabi na sa pagpaningkamot nga mabalik sa normal ang panginabuhi.
Sa eksklusibong pakighinabi sa Bombo Radyo Malaybalay kang Ruben T. Biado, Supervising Labor and Employment Officer sa DOLE–Bukidnon Provincial Field Office, gibutyag niini nga usa sa mga prayoridad sa Department of Labor and Employment (DOLE) ang paghatag og emergency employment alang sa mga biktima sa kalamidad.
Sumala pa ni Biado, naka-iskedyul na ang programa karong Oktubre 9, diin gibanabana nga 350 ka mga indibidwal sa unang batch ang nakapahimulos niini, samtang aduna na usab laing 398 ka residente ang kasamtangang gipailawom sa profiling aron mahimong benepisyaryo.
Dugang pa niini, nga aduna pa usab sunod nga batch sa maong programa aron masiguro nga daghang pamilya ang matabangan.
Gawas sa maong emergency employment, giandam usab sa DOLE ang Tulong Panghanapbuhay sa Ating Disadvantaged/Displaced Workers (TUPAD) Program, nga naghatag og temporaryong trabaho sa mga displaced workers ug mga naapektuhan sa kalamidad diin gikaingong liboan ka mga benepsyaryo ang gapay-out matag semana.
Dugang pa, gilauman usab nga mapalapdan ang tabang pinaagi sa DOLE Integrated Livelihood Program (DILP), usa ka inisyatibo nga nagtumong sa paghatag og panginabuhian sa mga benepisyaryo.