Subling nakasinati og pagbaha ang syudad sa Valencia, ning lalawigan, sa unang adlaw sa bag-ong tuig hangtud Enero 2 sa kagabhion.
Diin mikabat sa dili mu-menos sa 600 ka pamilya ang naapektuhan.
Matud sa taho lagmit nang milapas ang tubig baha sa usa ka tulay human sa pila ka oras nga kusog nga ulan nga miresulta paglunop sa tubig sa pipipa ka lugar sa Valencia City ug uban pang bahin sa Bukidnon.
Sumala sa City Disaster Risk Reduction and Management Office, ning kasamtangan padayon pa nga gisuta ang eksaktong gidaghanon sa mga balay nga naapektuhan, hilabi na sa duol sa Panlibatuhan Creek ug Malingon Creek.
Matud ni CDRRMO personnel Romnick Retuya, kasamtangang hugot ang pagmonitor sa mga otoridad sa Purok 20, Purok 21, Purok 6-A, Purok 13, ug Purok 16 sa Barangay Poblacion nga gikatahong sagad maapektohan sa paspas nga pagsaka sa tubig baha.
Samtang sa pikas bahin sa pakighinabi sa Bombo Radyo Malaybalay kang Director Antonio Sugarol sa Office of the Civil Defense Region 10, nasuta nga ang hinungdan sa insidente mao ang Easterlies nga dala sa hangin gikan sa sidlakan.
Apan hugot nga gipaabot niini nga walay angay kabalak-an gumikan walay natalang Low Pressure Area kon LPA ug mikunsad na usab ang tubig.
Dugang pa, giminungkahi niini nga mihupa na ang baha human ipatuman ang forced evacuation sa pipila ka mga residente sa apektadong mga lugar, ug nakabalik na sila sa ilang tagsa-tagsa ka mga panimalay.