Muabot sa labing menos 3,500 ka mga law enforcement personnel ang gipakatap sa tibuok Rehiyon 10 aron masiguro ang kaluwasan ug kahapsay sa publiko atol sa pagsaulog sa adlaw sa mga Santos ug Kalag.
Sa eksklusibong pakighinabi sa Bombo Radyo Malaybalay kang PMaj. Joann Navarro, tigpamaba sa Police Regional Office-10 (PRO-10), nagkanayon nga personal nga gibisita ni PBGen. Christopher N. Abrahano, Regional Director sa PRO-10, ang pipila ka sementeryo ug bus terminals sa rehiyon isip kabahin sa pagbantay ug pagmonitor sa kahimtang sa seguridad.
Sigon ni Navarro, adunay gibutang nga mga Police Assistance Desk sa mga places of convergence sama sa sementeryo, simbahan, terminal, ug uban pang pangpublikong lugar.
Sumala ni Navarro, nakadeploy na kagahapong adlawa, Oktubre 29, 2025, ang mga personahe sa lain-laing probinsya ug dakbayan, samtang karon anaa na sa heightened alert status ang tanang yunit.
Gawas sa mga kapulisan, adunay usab augmentasyon gikan sa Armed Forces of the Philippines (AFP), Philippine Coast Guard (PCG), ug Bureau of Fire Protection (BFP).
Sa kinatibuk-an, adunay 1,000 ka mga pulis ang gipakatap sa mga places of convergence, 1,700 ka force multipliers, ug kapin kon kulang 700 ka uban pang uniformed personnel gikan sa lain-laing ahensya sa gobyerno.