Mibahad ang lokal nga kagamhanan sa Valencia City sa kapin kon kulang 2,000 ka mga empleyado sa gobyerno nga dili ipabalik sa serbisyo kung dili mopailawom sa mandatory drug testing.
Sa eksklusibong pakighinabi kang Jun M. Galario, Jr., kanhi City Mayor, Consultant ug kasamtangang tigpamaba sa LGU Valencia City, gipadayag nini nga gikan Enero 2 hangtod Enero 5, 2026, adunay sobra sa 2,000 ka mga aplikante ug empleyado nga naglangkob sa job order, casual, ug uban pang contractual workers nga gikinahanglan nga moagi sa drug testing.
Klaro niining giingon nga dili dawaton ug dili irenew ang kontrata sa bisan kinsa nga empleyado kung wala makapresentar og balido ug opisyal nga resulta sa drug test nga gihimo lamang sa mga accredited nga drug laboratory sa Valencia City.
Matud pa ni Galario, tumong sa maong lakang ang pagsiguro nga ang tanang kawani sa lokal nga kagamhanan angay magsilbi sa publiko ug mahatag og batakang serbisyo sa komunidad.
Sa laing bahin, gipadayag usab sa lokal nga kagamhanan nga adunay gitagana nga P600 milyones nga pondo alang sa pagpalambo sa mga ospital ug pagpalit og modernong medical equipment sa syudad.
Dugang pa niini, nga gilauman kini nga makatabang sa pagpaayo sa kalidad sa serbisyong panglawas, pagpalig-on sa kapasidad sa mga pampublikong ospital, ug paghatag og mas paspas ug epektibong pag-atiman sa mga residente sa Valencia City.