Nagpadayon ang pagtaas sa lebel sa tubig sa mga lugar syudad sa Malaybalay. Gipahimangnoan sa City Disaster Risk Reduction and Management Office (CDRRMO) ug sa Barangay Public Safety Officers (BPSO) ang mga residente sa Barangay Simaya nga mag-evacuate human misaka ang lebel sa tubig tungod sa walay hunong nga pag-ulan.
Gibutyag ni Barangay Captain Nimfa Bautista, nga dunay kapin kon kulang 200 ka indibidwal gikan sa dul-an 80 ka pamilya ang kasamtangang gibakwit ngadto sa evacuation center sa Barangay Simaya tungod sa pagbaha.
Sa maong gidaghanon, lakip sa gipa-evacuate ang duha ka mabdos, napulo ka bata, duha ka senior citizen, ug usa ka PWD.
Gikompirma usab sa Kapitan nga adunay duha ka panimalay ang naanod sa baha, hinungdan nga gipadali ang pagbakwit sa ubang residente.
Samtang, adunay pipila ka indibidwal ang nagdumili sa pagbiya sa ilang panimalay, apan gisiguro sa barangay nga hatagan kini og hustong aksyon.
Sa laing bahin, pasado 5:30 sa buntag, dili malabangan ang crossing gikan sa Sto. Niño paingon sa Bangcud tungod sa grabe nga pagbaha.
Kasamtangan, gimonitor sa mga otoridad ang panahon ug andam sa pagpahigayon og dugang nga lakang kung mosamot pa ang sitwasyon.