Gisugdan na sa Independent Commission for Infrastructure – Technical Working Group (TWG) for Asset Recovery ang hugot nga pag-monitor sa mga kabtangan sa kapin 140 ka mga indibidwal nga nalambigit sa giingong anomaliya sa mga flood control projects sa nasud.
Sa exclusibong pakighinabi sa Bombo Radyo, gibutyag ni Atty. Renato Aboy Paraiso, ang chairman sa Technical Working Group, nga nakig-alayon na sila sa mga ahensya sama sa MARINA, CAAP ug Bangko Sentral ng Pilipinas.
Tumong niini nga masusi kon aduna ba silay mga luxury vehicles, eroplano o barko nga nakarehistro ubos sa ilang mga ngalan aron mapugngan ang pagbalhin o pagtago niini samtang nagpadayon ang imbestigasyon.Tumong sa maong lakang nga maseguro nga kon mapamatud-an nga sad-an sa korte, adunay mabawi nga mga kabtangan ang gobyerno isip bayad sa maong anomaliya.
Sa pikas bahin, gidugang usab sa Criminal Investigation and Detection Group (CIDG) ang walo ka kahon sa mga dokumento gikan sa Davao Oriental isip dugang ebidensya sa kaso. Kasamtangan, nakatutok ang komisyon sa pag-verify sa 79 ka mga flood control projects nga gidumala sa 15 ka dagkong kontraktor nga unang gipanganlan ni Presidente Ferdinand Marcos Jr.