Nagpadayag pag-usab ang kapolisan sa syudad sa Valencia sa ilang kusganong kampanya kontra iligal nga droga pinaagi sa malampusong operasyon nga misangpot sa sunod-sunod nga pagkasikop sa mga giilang drug personalities lakip ang pagkakumpiska sa gibanabana nga kapin singkwenta mil pesos nga droga.
Sa duha ka buy-bust operation nga gipahigayon sa Purok 3A, Barangay Poblacion ug Purok 5, Barangay Lourdes, Valencia City niadtong milabayng adlaw, nadakpan ang tulo ka giilang drug personalities. Ang unang duha giila nga sila alias “Bangkay,” 42 anyos, usa ka DI-listed personality, ug si alias “Justin,” 30 anyos, nga bag-ong natumbok sa kapolisan. Sunod nga operasyon misangpot sa pagdakop sa usa pa ka suspetsado nga nailhan nga si alyas “Fuego,” 32 anyos.
Nakumpiska gikan sa mga dinakpan ang gituohang shabu nga gibanabana og kantidad nga Php 51,680 ug dried marijuana leaves nga nagkantidad sa Php 2,400. Ang operasyon gipangulohan sa Valencia City Police Station kauban ang RPDEU 10, CADSUT, ug Provincial Intelligence Unit sa Bukidnon PPO uban sa suporta sa lokal nga pangagamhanan.
Karon, anaa na sa kustodiya sa kapolisan ang mga nadakpan ug maga atubang sa kasong paglapas sa Comprehensive Dangerous Drugs Act of 2002.