Gipangsunog sa Bukidnon Police Provincial Office (BukPPO), kauban ang Bureau of Fire Protection (BFP), ang kapin ₱114,333 nga kantidad sa ilegal nga pabuto nga nakumpiska sa tibuok probinsya sa Bukidnon human sa holiday celebrations, isip lakang sa pagpanalipod sa kaluwasan sa publiko.
Sa pakighinabi sa Bombo Radyo Malaybalay, gipahayag ni PCOL Oliver Sotto Navales, Provincial Director sa BukPPO, nga kabahin kini sa programa nga “Ligtas Paskuhan”, nga nagtumong sa pag-regulate sa pabuto ug pagpugong sa aksidente, ilabi na sa kabatan-onan.
Tungod sa kooperasyon sa komunidad, nahuman ang Pasko ug Bag-ong Tuig walay dagko nga insidente.
Gipatin-aw ni PCAPT Shiela Joy Jangad tigpamaba sa Bukidnon Police Provincial Office, nga ang disposal usa ka standard public safety procedure sa PNP ug BFP, nga gimando sa Republic Act 7183 (Firecracker Law) ug Executive Order No. 28.
Ang mga ilegal nga pabuto gikumpiska sa lain-laing lugar sa probinsya lakip ang Malaybalay ug Valencia, tali sa Disyembre 1, 2025 hangtod Enero 5, 2026, human sa 20 ka operasyon sa kapulisan.
Gikataho usab nga adunay lima ka fire-related incidents ug lima ka nasamdan, apan walay namatay, samtang zero ang insidente sa stray bullet ug indiscriminate firing.
Alang sa 2026, gipahayag ni Navales nga padayon nga prayoridad sa BukPPO ang kampanya kontra ilegal nga droga, pagdakop sa wanted ug most wanted persons, ug pagpalig-on sa partnership sa komunidad, samtang gidasig sa kapulisan ang katawhan nga i-surrender ang wala pa magamit nga ilegal nga pabuto sa pinakaduol nga police o BFP station aron malikayan ang disgrasya.