Kanhi Prime Minister sa Malaysia nga si Najib Razak gipahamtangan og dugang 15 katuig nga pagka bilanggo

Gihukman ug dugang 15 ka tuig nga pagkabilanggo ang kanhi prime minister sa Malaysia nga si Najib Razak tungod sa korupsyon nga may kalabotan sa multi-bilyon dolyar nga 1MDB scandal.

Gimultahan usab si Najib og $2.8 bilyon tungod sa pag-abuso sa gahum ug money laundering.

Sumala sa mga imbestigador sa Malaysia ug Estados Unidos, dili moubos sa $4.5 bilyon ang gituohang gikawat gikan sa 1Malaysia Development Berhad (1MDB), usa ka pondo sa gobyerno nga gitukod ni Najib niadtong 2009.

Kapin sa $1 bilyon usab ang gituohang misulod sa mga account nga may kalabotan kang Najib, nga nauna nang nabilanggo niadtong 2022 tungod sa laing kaso nga may kalabotan gihapon sa 1MDB scandal.