Nagpaabot og mensahe si kanhi Presidente Rodrigo Duterte alang sa ika 64 nga kasumaran sa adlawng natawhan ni Senador Ronald “Bato” Dela Rosa gikan sa iyang detention facility sa International Criminal Court (ICC) kagahapong adlawa.
Matud pa ni Vice President Sara Duterte, kinsa nibisita sa iyang amahan niadtong Huwebes, Enero 22, nangumusta ang kanhi presidente ug nipaabot sa iyang birthday wish alang sa iyang kanhi hepe sa kapulisan.
Sa iyang bahin, nipaabot usab og kaugalingong pagtimbaya ang Bise Presidente diin iyang gihangyo ang maayong panglawas, kalipay ug kalamposan alang sa senador karong “Year of the Horse.”Dugang pa sa taho, gibutyag ni VP Sara nga anaa sa maayong kondisyon ang iyang amahan sulod sa detention facility.
Bisan tuod naggamit na kini og tungkod tungod sa iyang pangedaron nga 81-anyos, normal gihapon ang iyang pagkaon ug aktibo pa kining makig-istorya.
Gihulagway sa Bise Presidente nga maayo ang kahimtang sa kanhi lider atol sa ilang panagkita.
Si kanhi Presidente Duterte kasamtangang anaa sa kustodiya sa ICC sa Netherlands sukad niadtong Marso 2025 may kalabotan sa “crimes against humanity” tungod sa iyang kampanya batok sa ilegal nga drugas sa nasud.