Pormal nang motestigo sa imbestigasyon sa Senate Blue Ribbon Committee ang kanhi gobernador sa Ilocos Sur nga si Luis “Chavit” Singson aron mohatag og katin-awan sa giingong mga anomaliya sa flood control projects sa nasud.
Kini human gikumpirma ni Senate President Pro Tempore Panfilo Lacson, ang chairperson of blue ribbon committee, nga nadawat na niini ang boluntaryong tanyag ni Singson nga motestigo sa maong isyu.
Matud ni Senador Lacson, si Singson mismo ang nagpadala og sulat ug personal nga miadto sa opisina niini niadtong Lunes, Marso 15, aron ipadayag ang intensyon.
Bisan wala pa ang pormal nga vetting o pagsusi sa testimonya niini, gitugotan ni Lacson ang hangyo ni Singson human masiguro nga ang pamahayag nakasentro sa maong kontrobersiya.
Dugang pa sa senador, bisan wala pay affidavit nga gisumite si Singson, igo na ang koneksyon sa pamahayag niini sa gihimong imbestigasyon.
Sa pagkakaron, gitakda ang sunod nga pagdungog sa Abril 14, apan dako ang posibilidad nga mapadali pa kini.
Samtang, gipadayag usab ni Lacson nga nabahin ang opinyon sa mga miyembro sa komite kon ipatawag ba ang 18 ka mga kanhi miyembro sa Marines.