Gibutyag ni Senate President Pro Tempore Panfilo “Ping” Lacson nga tinuyuan ni kanhing Department of Public Works and Highways (DPWH) Secretary Manuel Bonoan ang paghatag og sayop nga impormasyon sa Malacañang mahitungod sa giingong ghost flood control projects, aron maapektuhan o malibog ang nagpadayong imbestigasyon.
Sumala kang Lacson, liboan ka flood control projects ang adunay sayop nga grid coordinates nga nasulod sa sistema nga gisumite sa pangulo, hinungdan nga migawas ang numero nga 421 ka ghost flood control projects, nga dili tukma sa aktuwal nga datos.
Dugang pa sa senador, posible nga gihimo kini aron ipalangay o dauton ang kampanya sa gobyerno batok sa korapsyon, ilabi na sa mga infrastructure projects.
Tungod niini, gitawag sa Senate Blue Ribbon Committee si Bonoan sa sunod nga pagdungog sa Enero 19, uban ang mga dokumento gikan sa DPWH, lakip ang giingong Cabral files.
Mipahimangno si Lacson nga posibleng makasuhan og contempt si Bonoan ug isyu-an og warrant of arrest kung magpadayon ang pagdumili niini sa pag-atubang sa imbestigasyon sa Senado.