Nasiplatan sa nasud sa Portugal si kanhi Ako Bicol Representative Elizaldy Co, samtang nagpadayon ang pagsikop ug pag-imbestiga sa mga nalambigit sa gikaingong anomaliya sa flood control projects, sumala sa Department of the Interior and Local Government (DILG).
Matud ni Secretary Jonvic Remulla, posible nga duha ka pasaporte ang gigamit sa kanhing mambabalaod, lakip na ang usa ka Portuguese passport nga gituohang nakuha human milabay ang daghang panahon.
Bisan pa kanselado na ang Philippine passport niini, apan naghatag kini og kalibog tungod sa posibilidad nga adunay kini dual travel documents.
Wala usab extradition treaty ang Pilipinas sa Portugal diin posibleng mamahimong babag sa pagkasikop niini kon mapamatud-ang anaa si Co sa maong nasud.
Gisang-at na sa DILG ngadto sa DFA ang isyu sa extradition ug nangayo sila og tabang sa mga Pilipino sa abroad nga i-report ug kuhaan og hulagway si Co sanglit mamatikdan kini sa nasud sa portugal.
Niadtong Nobyembre 21, gipahibalo ni Pangulong Marcos Jr. ang pag-isyu og warrants of arrest batok kang Co ug 15 pa ka uban, lakip ang pipila ka opisyal sa DPWH ug Sunwest Corp., human gisang-at sa Ombudsman ang kaso sa corruption ug malversation of public funds kalabot sa giingong anomaliya sa P289 milyon nga flood control project sa Oriental Mindoro.
Busa gipadayag sa kalihim nga whole goverment approach ang pamaagi sa kagamhanan aron arestuhon ang puganteng mambabalaod.