Napukaw ang dakong hisgutan sa lungsod sa Impasugong kabahin sa panudlanan alang sa umaabot nga selebrasyon sa Aldaw Ta Impasugong.
Gikan sa gisugyot nga P8 milyon nga proposed budget, P1 milyon lamang ang giaprobahan sa konseho ug ni bise-Mayor Anthony Uy.
Sa usa ka eksklusibong pakighinabi sa Bombo Radyo Malayabalay, gipatin-aw sa bise-Mayor nga ang maong pagbabag sa nahisgutang budget mahitungod sa wala pa mabayri nga utang sa lungsod, ug giisip niini nga mas importante unahon ang pag-atubang sa mga obligasyon sa panalapi sa lungsod.
Apan, miluwat ang Alkalde sa lungsod nga si Mayor Jetaime Okinlay, nga ang dagkong utang nga nagkantidad og milyon-milyon ilawom kini sa liderato ni Uy sa miaging administrasyon diin tanang transaksyon pinaagi sa iyang pagtugot.
Gibutyag ni Mayor Okinlay, nga lakip niini ang P64 milyon nga notice of suspension ug P7 milyon nga notice of disallowance gikan sa Commission on Audit (COA), P65 milyon nga unliquidated inventories, ug laing P21 milyon nga unpaid obligations.
Miluwat ang Mayor, nga lisud bayaran ang mga utang nga wala kini kasayuran sa transaksyon, hilabi na 70% pa lamang sa lista sa inventories sa miaging administrasyon ang napasa sa kasamtangang administrasyon.
Giklaro usab sa Mayor, nga sa panahon nga kini usa pa ka konsehal, hingpit nga giduso sa miaging administrasyon, kauban ang budget officer, nga walay utang ang munisipyo.
Apan sa pag-abot sa bag-ong administrasyon, nakurat kini sa sunod-sunod nga mga demand ug pagpaningil sa nahisgutang kantidad ug mga obligasyon.