Nakatakdang mosang-at og kaso ang kampo ni kanhi Ako Bicol Partylist Rep. Zaldy Co. batok sa mga opisyal nga nagpahigayon sa paghilabot sa iyang mga luxury cars sa usa ka parking lot sa Taguig City niadtong Huwebes.
Matud pa ni Atty. Roy Rundain, abogado ni Co, adunay mga iregularidad sa gihimong operasyon sa Bureau of Customs (BOC) ug Highway Patrol Group (HPG). Giangkon sa abogado nga walay saktong documentation ug wala masunod ang Standard Operating Procedure sa pagkuha sa mga mahalong sakyanan.
Apan direcho nga midepensa si Atty. Chris Bendijo sa BOC ug gibarugan nga legal ang ilang aksyon. Matud niini ang operasyon gibase sa balidong search warrant nga giisyu sa Manila Regional Trial Court Branch 41.Sa report sa HPG, mukabat sa 14 ka luxury cars ang gisakmit gikan sa parking lot sa usa ka condominium sa Taguig. Walo niini ang nasulod sa search warrant samtang ang uban gikuha tungod sa kakuwang sa rehistro ug uban pang mga violation sa Land Transportation Office (LTO).
Ang maong mga sakyanan gipailalom na karon sa kustodiya sa Independent Commission for Infrastructure (ICI).Kahinumduman nga si Co nagpabilin nga wanted sa mga kasong graft, malversation, ug plunder kalabot sa giingong anomalya sa P489.5-million flood control project sa Oriental Mindoro.
Matud ni Interior Secretary Jonvic Remulla, ang katapusang nakit-an nga nahimutangan sa kanhi magbabalaod mao ang nasud sa Portugal. Nagpadayon pa ang imbestigasyon sa Criminal Investigation and Detection Group (CIDG) samtang gipahugtan sa gobyerno ang kampanya batok sa smuggling ug tax evasion.