Naghangyo ang kampo sa kanhing Pangulong Rodrigo Duterte sa International Criminal Court (ICC) nga tangtangon ang tulo ka bag-ong legal representatives sa mga biktima sa war on drugs tungod sa posibleng conflict of interest.
Sa 11-ka-pannid sa mosyon nga gisumite niadtong Pebrero 11, gipangayo sa abogado ni Duterte nga si Nicholas Kaufman sa Pre-Trial Chamber I nga bawi-on ang pagtudlo nila Joel Butuyan, Gilbert Andres, ug Nicolene Arcaina isip Common Legal Representatives sa mga biktima.
Matud sa depensa, usa sa mga abogado ang mibatikos sa ilang legal nga estratehiya sa media ug nagpagawas sa mga nauna nga opinyon bahin sa akusado.
Gibutyag usab nga si Arcaina kaniadto staff lawyer sa CenterLaw Philippines, diin dugay nang konektado sila Butuyan ug Andres, nga mahimong magpakita og padayon nga propesyonal nga relasyon nga posible dili angay sa integridad sa pagdungog.
Gihangyo usab sa depensa nga isuspend ang access sa mga representante sa mga rekord sa kaso aron malikayan ang posibleng paggamit sa mga materyales nga makapawala sa sala ni Duterte.