Gitutokan karon sa usa ka abogado ang pamaagi sa pagdepensa sa kampo ni kanhi Presidente Rodrigo Duterte batok sa mga presentasyon sa prosekusyon sa International Criminal Court kon ICC.
Sa eksklusibong pakighinabi sa Bombo Radyo Malaybalay, gipadayag ni Atty. Eddie Cuaresma, kanhi Presidente sa Integrated Bar of the Philippines, nga ang kasamtangang hugna sa proseso anaa pa lamang sa preliminary ug wala pa maglakip sa pagpresenta sa mga testigo.
Sumala ni Cuaresma, pareho ang pamaagi sa hurisdiksyon sa ICC ug sa mga korte sa Pilipinas nga nagabase sa kamatuoran ug sa kalidad sa mga ebidensyang gipresenta sa duha ka kampo.
Matud niini, klaro sa presentasyon sa prosekusyon ang istruktura sa gikaingong Davao Death Squad, lakip ang pagsugod niini, ang pamaagi sa operasyon, ug kung giunsa kini gipalapad ngadto sa usa ka gikaingong national scheme.
Dugang pa, gipakita usab sa prosekusyon ang mga publikong pamahayag ug pronouncement ni Duterte aron ipakita ang koneksyon sa mga panghitabo.
Samtang gipasabot ni Cuaresma, nga ang depensa sa kampo ni Duterte mas general ang atake ug kulang sa espesipikong pagtubag sa matag alegasyon.
Sigon niini, adunay gamay nga bentaha ang prosekusyon tungod mas detalyado ang presentasyon ug mas klaro ang pagkakonektar sa mga sitwasyon ug panghitabo nga gipasang-at.