Gipanghimakak sa kampo sa kanhi engineer sa Department of Public Works and Highways (DPWH) nga si Brice Hernandez ang mga taho nga aduna siyay “recantation” o pagbawi sa iyang testimonya kalabot sa mga maanomaliyang proyekto sa flood control.
Matod sa iyang abogado nga si Atty. Ernest Levanza, dili tinuod ang giingong pagbawi ug ilang klarohon ang maong isyu sa pagdungog sa Senate Blue Ribbon Committee karong Enero 19.
Mipasundayag usab si Senador Panfilo Lacson, ang tsirman sa Blue Ribbon Committee, nga hisgotan kini nga butang ug nagpahinumdum nga bisan kinsa nga mobawi sa ilang testimonya mahimong manubag sa kasong “perjury” tungod kay gipanumpaan ang ilang mga pamahayag.
Giklaro usab sa Department of Justice (DOJ) nga wala pa silay nadawat nga affidavit gikan kang kanhi DPWH District Engineer Henry Alcantara nga nagbawi sa iyang testimonya.
Sumala sa ahensya, wala usab nakabutang sa iyang mga counter-affidavit nga iyang gibawi ang iyang mga naunang pamahayag, bisan pa man og una na niyang gihimakak ang iyang kalambigitan sa mga “ghost flood control projects.”