Nagpasabot si Atty. Gabriel Villareal, ang lead counsel ug tigpamaba ni Charlie “Atong” Ang, nga temporaryo una siyang dili moatubang sa media aron dili maapektuhan ang mga legal nga lakang nga gihimo alang sa iyang kliyente.
Sumala ni Villareal, mopagawas na lang ang iyang opisina og opisyal nga pamahayag kon gikinahanglan aron maghatag og update sa kaso.
Gipahibalo usab niya nga karong adlawa, mopasaka ang depensa ni Ang og Omnibus Motion aron ipawalay-bisa ang warrant of arrest nga giluwatan sa korte sa Laguna may kalabotan sa pagkawala sa mga sabungero.
Nanghinaot ang kampo ni Ang nga daling magtakda og pagdungog ang korte alang sa ilang mosyon sa sunod semana. Giinsistir ni Villareal nga gidali-dali ang pagpagawas sa arrest order ug nakalapas kini sa katungod sa iyang kliyente tungod kay kuwang ang impormasyon nga gihatag sa Department of Justice (DOJ).
Gipasabot usab sa abogado nga busy siya sa pag-andam sa mga importante nga legal nga dokumento maong dili una siya makatubag sa mga pangutana.
Bisan pa niana, gipaniguro ni Villareal nga gihatagan nila og bili ang tinguha nga madungog ang pamahayag ni Ang ug mahimong abli siya sa mga interview kon mahatagan na og solusyon ang mga legal nga panginahanglanon sa iyang kliyente.