Ipaubos sa masusing pagsusi sa House Committee on Justice ang form and substance sa duha ka reklamo sa impeachment batok kang Vice President Sara Duterte sa dili pa kini hingpit nga aksyonan.
Kini ang gikumpirma ni House Deputy Majority Leader Gil Acosta. Matud niini, kinahanglan nga moagi sa saktong ebalwasyon ang mga reklamo, lakip na ang affidavit sa kanhi aide nga si Ramil Madriaga nga gigamit nga basehan sa maong kaso.
Sa pikas bahin, gipahayag ni Atty. Raymund Palad, abogado ni Madriaga, nga andam ang iyang kliyente nga moatubang sa Kamara, Senado, o Ombudsman kon tawgon pinaagi sa subpoena. Giingong nagkupot sila og tulo ka mobile phones ni Madriaga nga adunay mahinungdanong ebidensya.
Andam usab ang kampo ni Madriaga nga ipaubos sa forensic examination ang maong mga cellphone aron pamatud-an ang mga alegasyon sa iregularidad sa pondo ug ang koneksyon niini sa pipila ka personalidad.
Sa maong affidavit, gihisgutan ang mga ngalan nina Michael Yang, kanhi adviser ni kanhi Presidente Rodrigo Duterte ug Ling Wei Xiong sa mga transaksyon ug paghatod sa kwarta.