Gisugyot ni House Ways and Means Chairman ug Marikina Rep. Miro Quimbo nga ipasaka ang bag-ong “Bayanihan 3” aron tubagon ang kasamtangang krisis sa ekonomiya ug pagsaka sa presyo sa lana.
Matod ni Quimbo, magsugod ang pormal nga paghisgot sa komite sa Abril 8 samtang padayon ang konsultasyon sa mga eksperto aron maporma ang sugyot.
Ang Bayanihan 3 dili lang maghatag og direkta nga ayuda, apan magpalig-on usab sa dugay nang gikinahanglan nga reporma, lakip na ang pagtukod sa digital o electronic subsidy system nga nakabase sa National ID aron mas paspas ug target ang pag-apod-apod sa tabang.
Gidugang pa ni Quimbo, nga kinahanglan tukion ang mga sektor ug industriya nga grabe ang epekto sa krisis ug mangita og pondo gikan sa “windfall” sama sa dugang nga VAT collection ug kita gikan sa foreign reserves.
Gikinahanglan usab nga palig-onon ang kapasidad sa nasud sa pagbangon pinaagi sa alternatibong enerhiya sama sa solar, geothermal, ug natural gas, ug pag-establisar sa national petroleum reserve.
Gihisgutan usab sa Kongreso ang posibleng pagtangtang o pag-adjust sa VAT sa petrolyo, apan giila ni Quimbo nga komplikado kini gumikan maapektohan ang mga konsumidor.
Sa laing bahin, gisugyot niya nga ilakip ang petrolyo sa listahan sa basic necessities ug prime commodities aron mas mapalig-on ang monitoring ug regulasyon sa presyo, ug matabangan ang Department of Trade and Industry ug lokal nga gobyerno sa pagpugong sa posibleng pang-abuso sa presyo sa lana.
Kini nga sugyot giila nga usa ka dali nga matuman aron maprotektahan ang mga konsumidor batok sa kalit nga pagsaka sa presyo.