Gipasalig ni House Speaker Bojie Dy nga patas, klaro, ug subay sa due process ang pagtagad sa mga verified impeachment complaints batok kang Vice President Sara Duterte, atol pagdungog sa House Committee on Justice ning adlawa, Marso 2, 2026.
Matud ni Dy, ang tanang napili nga opisyal angayan sa hustong proseso, samtang ang mga nagreklamo adunay katungod nga madungog sumala sa balaod.
Gipunting usab ni House Justice Committee Chair Gerville Luistro, nga ang impeachment usa ka konstitusyonal nga mekanismo ug dili social media contest.
Giklaro usab niini, nga ang desisyon sa Supreme Court sa miaging reklamo nakapokus lamang sa one-year bar rule ug wala motimbang sa merito sa mga alegasyon.
Giduso usab niini nga angayan magpadayon ang pagdungog aron mapadayag ang kamatuoran.
Sa laing bahin, gipadayag usab ni Leila de Lima, representante sa Mamamayang Liberal party-list, ang unom ka batayan sa impeachment batok kang Duterte, lakip ang gikaingong betrayal of public trust, graft and corruption, ug uban pang seryosong akusasyon.
Samtang gideklarar sa House Committee on Justice ang ikatulo ug ikaupat nga impeachment complaints batok kang Bise Pres. Sara Duterte “sufficient in form.”
Ang ikatulong reklamo gipasaka sa religious leaders samtang ang ika-upat nga complaint gipasaka ni Atty. Nathaniel Cabrera.
Sunod nga hisgutan sa Komite ang pagtino kung ang mga reklamo “sufficient in substance.”
Magpadayon ang deliberasyon ugmang adlawa, Marso 3, 2026.