Gikwestyon ang kalig-on sa impeachment case batok kang Bise Presidente Sara Duterte human kini gibasura sa Korte Suprema, nga nagmugna og kabalaka sa posibleng pag-abuso sa proseso sa impeachment tungod sa kaluagan sa balaod nga mahimong gamiton batok sa mga opisyal bisan pa walay lig-on nga basehan.
Sa pakighinabi sa Bombo Radyo Malaybalay, gisaysay ni Atty. Eddie Cuarisma, usa ka legal expert, nga adunay kahuyang ang proseso sa pagbasura sa maong kaso tungod kay wala kini giaksyoni sa House of Representatives sukad kini napasa. Bisan pa nga wala kini gi-endorso, matod pa niya nga debatado kini ug nagkinahanglan og klarong hustisya ilawom sa balaod.
 Dugang pa ni Cuarisma, delikado ang kahimtang kon tugutan nga bisan kinsa makapasa og reklamo nga walay porma o lig-on nga basehan — nga mahimong maghatag og gahum sa House of Representatives sa pagpasa og mga kaso ngadto sa Senado bisan og walay hinungdan.
Nagpabilin ang kabalaka nga magamit ang proseso sa impeachment isip instrumento sa pamolitika kon dili kini masuta ug masal-igan sa ligal nga paagi.