Gipadayag ni Bicol Saro Partylist Rep. Terry Ridon nga misaka og hapit ₱70 milyon o sobra sa 1,200 porsyento ang net worth ni Vice President Sara Duterte gikan 2008 hangtod 2024.
Sa pagdungog sa House Committee on Justice kabahin sa ika-upat nga impeachment complaint batok sa Bise Presidente, sumala ni Ridon nga base sa mga Statement of Assets, Liabilities, and Net Worth (SALN), ang net worth ni Duterte anaa sa ₱18.49 milyon niadtong 2008 ug ₱18 milyon niadtong 2009.
Pag-abot sa 2023, misaka kini sa ₱77.5 milyon ug ₱88.5 milyon niadtong 2024.
Matud ni Ridon nga kini mahimo’g tawgon nga “unexplained wealth”, usa sa mga isyu nga gilatid sa impeachment complaint.
Bisan pa, giinsistir sa pipila ka mambabalaod nga kinahanglan pa og mas tukma nga ebidensya sama sa detalyado nga bank accounts.
Sa bahin ni Justice Committee Chairman, Rep. Gerville ‘Jinky Bitrics’ Luistro, nagpasabot kini nga dili kinahanglan ipakita sa kasamtangang hugna sa proseso ug mahimo kini hisgutan kung mo-uswag ang kaso ngadto sa Senado isip impeachment court.
Gihulagway usab ni Ridon ang reklamo nga itandi sa nahitabo sa kaso ni kanhing Renato Corona, diin napakita ang ebidensya sa mismong paglitis sa Senado.
Sa pikas bahin, gikwestyon ni Cagayan de Oro Representative Rufus Rodriguez ang authenticity sa mga maong dokumento ug gipangutana si Terry Ridon kon na-authenticate na ba kini sa Office of the Ombudsman.
Mitubag si Ridon, nga wala niini makita nga kiinahanglan nga ipa-authenticate pa kini gumikan ang mga SALN sa Bise Presidente usa ka public record.
Gisuportahan usab kini ni Leila De Lima, nga miingon nga mahimo ang authentication sa panahon na sa presentasyon sa ebidensya.
Apan giinsistir ni Rodriguez nga kinahanglan karon pa lamang ma-authenticate na ang mga dokumentong gipagawas.