Personal nga motambong ang pipila ka kabanay sa mga giingong biktima sa extrajudicial killings (EJK) ubos sa “war on drugs” sa administrasyong Duterte sa umaabot nga confirmation of charges hearing batok kang kanhi Presidente Rodrigo Duterte. Ang maong pagdungog ipahigayon didto sa The Hague, Netherlands karong umaabot nga Lunes, Pebrero 23.
Lakip sa mga molarga mao si Shira Escudero, igsoon sa usa sa mga biktima sa drug war. Matod ni Escudero, tinguha niya nga maatubang ang kanhi presidente aron pamatud-an nga tinuod ug daghan silang mga pamilya nga nawad-an og minahal sa kinabuhi tungod sa maong kampanya.
Gawas sa pagtambong sa korte, magpahigayon usab og mga solidarity activities ug pag-martsa paingon sa International Criminal Court (ICC) ang ubang mga pamilya, kauban ang pipila ka human rights groups didto sa The Hague. Aduna usay mubo nga programa nga pagahimoon sa dili pa sila mosulod sa edipisyo aron saksihan ang pagdinig.
Kahinumduman nga una nang nideponya sa ICC silang Edgar Matobato ug Arturo Lascañas kinsa niangkon nga nahimong sakop sa Davao Death Squad (DDS) ug nibutyag nga adunay direktang mando sa pagpamatay sa ilang mga biktima.
Samtang, gipahayag ni ICC Assistant to Counsel Cristina Conti nga mahimong molungtad og hangtod sa tulo ka oras ang matag adlaw nga hearing isip konsiderasyon sa panglawas sa kanhi pangulo. Tungod sa limitado nga oras, posible usab nga dili makapresentar og mga saksi ang prosekusyon niining bahina sa proseso.