Nakita sa House Committee on Justice nga sufficient in substance ang duha ka verified impeachment complaints batok kang Vice President Sara Duterte aron mo-uswag ang proseso sa impeachment sa Kamara.
Sa boto nga 54 ang pabor, usa ang supak ug walay abstention alang sa ikatulo ug ika-upat nga reklamo.
Ang ikatulong reklamo, nga gisang-at sa mga pari, madre, ug abogado ug giendorso ni ML Partylist Rep. Leila De Lima, may kalabutan sa giingong sayop nga paggamit sa ₱612 milyong confidential funds ug uban pang isyu sa panahon nga kalihim pa kini sa Department of Education.
Samtang ang ika-upat nga reklamo nga gisang-at sa abogado nga si Nathaniel Cabrera nagtumong sa giingong wala pagdeklarar sa pipila ka mga kabtangan ug dili mapasabot nga kabtangan o “unexplained wealth.”
Human sa botohan, nagpasaka og mosyon si San Juan Rep. Ysabel Maria Zamora nga padalhan og abiso ang Bise Presidente aron magsumite sa iyang tubag sulod sa 10 ka adlaw nga dili na pwede malangay, sumala sa patakaran sa Kamara.
Gipunting sa mga mambabalaod nga ang desisyon dili pasabot nga nakasala ang Bise Presidente, kundili lakang lamang aron ipadayon ang proseso.
Kung makasumite na ang Bise Presidente sa iyang tubag, tukion sa komite kung adunay probable cause aron ipasaka ang Articles of Impeachment sa plenaryo.
Sa pikas bahin, gibutyag ni Sara Duterte nga dili prayoridad sa iyang opisina ang pagbantay sa mga impeachment proceedings batok kaniya.
Sa dihang gipangutana kung gimonitor ba niini ang mga kalihokan sa House of Representatives, mitubag ang Bise Presidente nga daghan siya’g lain nga ginabuhat nga trabaho.