Gikumpirma sa social media personality nga si Jack Argota nga peke ang kopya sa medical records ni Presidente Ferdinand Marcos Jr. nga iyang gipakaylap sa social media. Kini nga pag-angkon nahitabo atol sa iyang pag-atubang sa National Bureau of Investigation (NBI) – Cybercrime Division kaniadtong Miyerkules, Pebrero 18.
Sumala sa taho, nituman si Argota sa subpoena nga gipadala kaniya aron muhatag og katin-awan sa maong isyu. Sa iyang pamahayag ngadto sa mga otoridad, nangayo kini og pasaylo sa pagpakalat sa maong dokumento ug miingon nga ningsunod lamang kini sa gibuhat sa ubang mga personalidad sa internet.
Si NBI Director Lito Magno nagkanayon nga pormal nang nadawat sa ilang buhatan ang statement ni Argota.
Giklaro ni Magno nga bisan pa man sa pag-tug-an sa vlogger, magpadayon ang imbestigasyon aron sutaon ang angay nga tulubagon niini ubos sa balaod.Gidugang usab sa direktor nga ang kaso ni Argota giisip nga usa ka lahi nga imbestigasyon gikan sa cyberlibel complaint nga gipasaka na sa NBI batok nilang Jay Sonza ug Eric Celiz, kinsa nalambigit usab sa pagpakatap sa susamang peke nga dokumento.
Sa usa ka video nga gipagawas ni Argota human sa iyang pakighinabi sa NBI, iyang gipasalamatan ang ahensya sa ilang propesyonalismo.
Nanawagan usab kini sa publiko nga suportahan ang NBI ug sabton ang proseso sa balaod. Kasamtangan, nagpaabot pa ang publiko sa dugang lakang sa NBI kon duna bay pormal nga kasong ipasaka batok kang Argota sa musunod nga mga adlaw.