Gipunting sa legal nga eksperto nga ang isyu sa West Philippine Sea gigamit na isip “instrumento” sa politika imbis nga magpasiugda sa panaghiusa sa nasod sa pagpanalipod sa katungod sa Pilipinas.
Sa pakighinabi sa Bombo Radyo Malaybalay kay Atty. Proculo T. Sarmen, usa ka legal nga eksperto, gipatin-aw niini nga aduna’y arbitral ruling ubos sa United Nations Convention on the Law of the Sea nga nagbasura sa nine-dash line claim sa China ug naghatag sa Pilipinas og katungod sa 200 nautical miles nga Exclusive Economic Zone (EEZ) alang sa eksplorasyon ug eksploitasyon sa natural nga bahandi. Ang territorial sea nga 12 nautical miles gikan sa baybayon sakop sa soberanya sa nasod ug walay laing makasulod nga walay pagtugot.
Bisan pa niini, miingon ang abogado nga nagkakaroon og tensyon tungod sa overlapping maritime claims sa ubang nasod ug kakulang sa epektibong diplomatic strategy. Matud pa niya, imbis nga maghiusa, nahimong isyung politikal ang West Philippine Sea diin ginabahin ang opinyon sa katawhan ug makaapekto pa sa diplomatikong relasyon ug ekonomiya sa nasod.
Giawhag ni Sarmen ang gobyerno nga palig-onon ang diplomatikong pamaagi ug panaghiusa sa pagdepensa sa legal nga katungod sa Pilipinas ubos sa internasyonal nga balaod.