Gihangyo sa legal expert nga si Atty. Proculo T. Sarmen ang mga opisyal sa nasud nga isalikway ang pamulitika ug panagdebatihay may kalabotan sa isyu sa West Philippine Sea (WPS). Kini human miguwa ang taho bahin sa hagit ni Senator Rodante Marcoleta og debate tali sa Philippine Coast Guard (PCG) ug Philippine Army.
Matud pa ni Atty. Sarmen, ang maong isyu dili dapat himuong “partisan politics” tungod kay kini naglambigit sa soberanya sa nasud, international law ug kalinaw sa rehiyon. Ang interes sa nasud angay nga mas labaw kaysa sa interes sa bisan unsang politikal nga partido.
Gipasabut sa niini nga ang katungod sa Pilipinas sa WPS nakabase sa United Nations Convention on the Law of the Sea ug sa 2016 Arbitral Ruling. Saysay pa niini, ang maong ruling nagpamatuod nga walay legal nga basehan ang 9 dash line nga giangkon sa China.
Giawhag usab ni Atty. Sarmen ang mga lideres sa nasud nga magpabiling kalmado ug ipaagi sa bisan unsang diskusyon sa saktong “diplomatic channels,” sama sa Department of Foreign Affairs (DFA). Kini aron malikayan ang dugang tensyon o misinterpretasyon sa ubang kanasuran nga mahimong musangpot sa mas dakong problema
Gidugang niini nga bisan gamay nga nasud ang Pilipinas, kinahanglan nga mahimong praktikal ug lig-on ang prinsipyo sa pagpanalipod sa mga natural resources para sa mga sumusunod nga henerasyon.