Kapin kon kulang 4,000 ka mga personahe sa Philippine National Police (PNP) ug mga force multipliers ang gipakatap sa tibuok probinsya sa Bukidnon aron masiguro ang hapsay nga dagan sa duha ka dagkong okasyon: ang Kaamulan Festival 2026 ug ang Northern Mindanao Regional Athletics Association (NMRAA) Meet 2026.
Sumala ni PCol. Oliver S. Navales, ang PNP-Bukidnon Director, prayoridad sa ilang deployment ang kaluwasan sa mga lumulupyo, mga atleta, ug mga turista nga musaksi sa maong mga kalihukan.
Samtang gipasalig niini nga himuon sa kapulisan ang tanan aron magpabiling layo sa bisan unsang matang sa krimen ang tibuok selebrasyon.
Ang pormal nga pag-abli sa Kaamulan Festival ug ang pagsugod sa NMRAA Meet, diin ang Bukidnon ang nagsilbing host, gikatakda ugmang adlawa, Marso 19, 2026.
Subay niini, gibutyag ni Dr. Ricardo Dragon, Regional Sports Officer DepED Region 10, nga andam na probinsya pagsugod sa mga sporting events nga gilankuban sa 700 ka mga opisyales gikan sa nagkalain-laing dibisyon alang na sa maong kalampusan sa preparsyon.
Dugang pa niini nga kapin 9,000 hangtud 10,000 ka mga atleta ang makiglantugi sa maong kalihukan diin gisuporthan ug pagatambungan sa pipila ka dagkong opisyal sa nasud.