Gipatawag pag-usab ang pipila ka indibidwal ug mga representante gikan sa nagkadaiyang ahensya sa kagamhanan atol sa sesyon sa Sangguniang Panlalawigan sa Bukidnon.
Kini aron masuta ang kasamtangang sitwasyon ug progreso sa gitukod nga Bukidnon Airport nga nahimutang sa lungsod sa Don Corlos.
Lakip nsa mga giimbitahan mao ang mga opisyales gikan sa Department of Public Works and Highways (DPWH) Region 10, First Bukidnon Electric Cooperative (FIBECO), ug ang Civil Aviation Authority of the Philippines (CAAP).
Tumong sa maong panagtigom nga makakuha og klarong impormasyon ang probinsya kalabot sa dagan sa konstruksyon ug uban pang aspeto o mga isyung giatubang sa maong proyekto.
Matud ni Atty. Oliver Owen Garcia, Chairman sa Committee on Engineering and Public Works, gituki niini ang distansya sa terminal sa maong tugpahannan paingon sa national highway diin anaa matud pa sa 1.2 kilometros, lakip na usab ang pag-energize sa kuryente sa pinaagi sa FIBECO kon matuman ba sa gitakdang panahon.
Bisan paman sa maong hagit ug isyung giatubang sa padayon nga pagtukod sa Bukidnon Airpport, gipasalig ni Engr. Arlyn E. Lusterio, Project Inspector sa DPWH Region 10, nga walay angay kabalak-an gumikan aduna nay mga bahin niini ang natapos na, samtang ang uban laumang mahuman sa dili madugay subay sa gikatakdang panahon nga target ablihan ang maong tugpahanan.
Subay niini adunay daghang pangutana ang nahisgutan sulod sa maong sesyon ilabi ang ang kalit nga paghunong sa pipila ka hugna sa konstruksyon tungod sa isyu sa permit og ownership sa yutang gitukuran ug uban pa, apan padayon ang paglihok sa mga ahensyang responsable sa pagtukod niini ug nakigkoordinar sa nagkadaiyang ahensya.
Samtang hugot usab nga gipahibalo sa bahin sa FIBECO nga andam ng i-energize ang Bukidnon airport sa higayon nga matapos na ang major constructions.