Gikumpirma ni Israeli Prime Minister Benjamin Netanyahu nga naguba sa pwersa sa Israel ang compound ni Iran Supreme Leader Ayatollah Ali Khamenei ug napatay ang mga tag-as nga komander sa Islamic Revolutionary Guard Corps (IRGC), lakip na ang mga importanteng personalidad sa nuclear program sa Iran.
Sa maong operasyon, nagtinabangay ang Israel ug Amerika nga nagtinguha nga tapuson ang hulga sa rehimeng Ayatollah sa Iran. Matud pa ni Netanyahu, daghang mga timailhan ug senyales nga napatay sa maong operasyon si Khamenei.
Ubos sa “Operation Roaring Lion,” gikumpirma ni Netanyahu nga usa ka kalit nga pag-atake ang nagguba sa kuta ni Ayatollah Khamenei sa Tehran ug nakatumba sa mga tag-as nga opisyal sa Revolutionary Guards ug mga lider sa nuclear program.
Nagpasalamat usab ang Prime Minister ngadto kang President Donald Trump tungod sa lig-on nga alyansa ug suporta sa Amerika sa maong operasyon.
Sumala pa ni Netanyahu, tumong niining maong lakang nga pugngan ang Iran nga makabaton og mga nuclear weapons ug mahatagan og higayon ang mga katawhan sa Iran nga mapatalsik ang ilang madaug-daugon nga rehimen. Gipasiatab niya nga ang “War of Redemption” maghatag og tinuod nga kalinaw sa Middle East.
Gidayeg usab ni Netanyahu ang “historic leadership” ni President Donald Trump, kinsa iyang gitawag nga lider nga nagatuman sa iyang mga saad. Matud pa niya, ang alyansa sa duha ka nasod anaa na sa pinakataas nga ang-ang karon, sa panahon man sa kalinaw o sa gubat.
Samtang, napatay usab sa Israel si Gholamreza Soleimani, ang namuno sa Basij, ang gikahadlokan nga paramilitary force sa Iran. Subay niini, nanawagan si Netanyahu sa mga Iranian nga dili usikan kining higayuna ug giawhag sila nga mugawas sa kadalanan aron itumba ang rehimen.