Emosyonal nga nagtagbo pag-usab ang usa ka tag-iya ug ang iyang iro nga upat ka tuig nang nawala human kini makuha sa mga otoridad pinaagi sa tabang sa usa ka microchip.
Ang maong tag-iya nga si Leovigildo Ramirez, kinsa nagpuyo na karon sa Wisconsin, wala duha duha sa pagmaneho sulod sa 16 ka oras taliwala sa kusog nga snowstorm padulong sa Philadelphia aron lamang makuha ang iyang pinalanggang iro nga si Cipi.
Sumala sa Animal Care & Control Team (ACCT) sa Philly, ang iro nga si Cipi gidala sa ilang shelter isip usa ka “stray” o latagaw nga iro.
Sa dihang gitan-aw ang microchip niini, nasuta nga kini ang iro nga nareport nga nawala sa susamang lugar niadtong tuig 2022.Saysay pa ni Ramirez, nawala si Cipi upat ka tuig na ang nakalabay sa dihang kalit kining midagan palayo samtang nagpasulod sila og mga grocery sa ilang balay.
Bisan pa man sa pagbalhin nila og puyo sa laing estado, wala ni Ramirez lung-i ang pag-update sa impormasyon sa microchip ni Cipi sa paglaum nga makit-an pa kini og balik.
Tungod sa maong insidente, gidayeg sa ACCT Philly ang kamahinungdanon sa pagpabutang og microchip sa mga binuhing mananap aron dali kining mailhan ug mabalik sa ilang mga tag-iya sa higayon nga mawala.