Nagpagawas og pasidaan ang nasod sa Iran nga andam silang mobalos kung ugaling mopahigayon og pag-atake ang Estados Unidos batok kanila.
Sumala ni Revolutionary Guard spokesperson Mohammad Ali Naini, dili gayod angay masayop ang US sa pagsulod sa ilang territorial waters tungod kay sigurado ang ilang himuong pagbalos.
Kini nga pamahayag migawas human namatikdan ang pag-abot sa USS Abraham Lincoln sa Middle East. Ang pagpadala sa maong aircraft carrier kabahin sa pasidaan ni US President Donald Trump tungod sa nagpadayong gubot sa protesta sa Iran.
Una na usab nga gipadayag ni Trump nga andam sila nga motubag sa hangyo sa pipila ka opisyal sa Iran alang sa diplomatikanhong panagsultigay o negosasyon.
Kahinumduman nga moabot na sa pipila ka libo nga mga raliyista ang namatay sukad sa pagbuto sa mga protesta tungod sa nagkagrabe nga krisis sa ekonomiya sa maong nasod.