Pormal nang gitudlo isip ikatulong Supreme Leader sa Iran ang 56-anyos nga si Mojtaba Khamenei, dungan sa paglunsad sa nasod og sunod-sunod nga missiles batok sa Israel.
Kini nga lakang giisip nga unang aksyon sa iyang pagpamuno, siyam ka adlaw human napatay ang iyang amahan nga si Ayatollah Ali Khamenei sa gipahigayon nga airstrikes sa Amerika ug Israel. Ang pagkapili ni Mojtaba gipahibalo sa 88-member Assembly of Experts pinaagi sa state television sa Iran.
Isip pagpakita sa ilang kusog, nagpagawas og video ang state media diin makita ang mga missiles nga gipabuthan paingon sa Israel nga adunay suwat nga: “At Your Command, Sayyid Mojtaba.” Aduna usab mga nadunggan nga pagpamuto sa Qatar, diin nahimutang ang usa ka dako nga air base sa Amerika.
Nailhan ang bag-ong lider nga usa ka “hardliner” ug gilauman nga mopadayon sa higpit nga mga polisiya sa iyang amahan. Samtang, nakadawat na og direktang bahad ang paglingkod ni Mojtaba gikan sa mga kagamhanan sa Estados Unidos ug Israel.