Gipakusgan karon sa kapulisan ug kasundalohan ang pagpanguna sa whole-of-nation approach batok insurgency, aron mapugngan ang hulga sa rebelyon.
Sa pakighinabi sa Bombo Radyo Malaybalay, gipadayag ni Police Major Joann Navarro, tigpamaba sa Police Regional Office 10, nga wala’y namonitor nga bag-ong recruitment sa New People’s Army (NPA) sa rehiyon.
Lakip sa mga gipahigayon nga inisyatiba sa pagpanalipod ang pagbisita ug pag-edukar sa mga tulonghaan aron mapaligon ang kahibalo sa kabataan ug malikayan ang impluwensya sa walhong grupo.
Padayon usab ang implementasyon sa Revitalized-Pulis sa Barangay (R-PSB) ug uban pang programa nga naghatag og suporta sa komunidad.
Gipasabot usab ni Navarro, nga importante ang mga programa sama sa Enhanced Comprehensive Local Integration Program (E-CLIP), nga nagtanyag og ayuda ug benepisyo alang sa mga mosurender nga rebelde aron maawhag kini pagtahan balik sa sabakan sa gobyerno ug makasugod og bag-ong kinabuhi.
Matud pa sa tigpamaba sa PRO10, gamay na lamang ang nahabilin nga mga miyembro sa NPA sa rehiyon tungod sa padayong pagsalig sa mga programa sa gobyerno nga nag-awhag kanila sa pagpili sa kalinaw.