Nagpadayon ang mga insidente sa sunog sa probinsya sa Bukidnon karong tuiga, apan base sa datos sa Bureau of Fire Protection (BFP) – Bukidnon, mikunhod kini kung itandi sa kaparehong panahon sa miaging tuig.
Matud ni SFO1 Reny Rubillos, Officer-in-Charge sa Operations Division sa BFP-Bukidnon, adunay 18 ka rekord nga insidente sa sunog sa bulan sa Hulyo samtang upat (4) ka insidente sa sunog nga naitala karong buwan sa Agosto.
Sa kinatibuk-an, gikan sa Hulyo hangtod karong panahona, adunay 22 ka insidente sa sunog ang natala sa tanang bahin sa lalawigan.
Gibutyag ni Rubillos, nga kasagaran niini mao ang mga sunog sa imprastraktura ug mga pribadong estruktura.
Samtang, gipahibalo usab ni SFO1 Rubillos, nga magpahigayon og Provincial Olympics karong Agosto 19–20, 2025 sa Capitol Grounds sa syudad sa Malaybalay.
Ang maong kalihokan gilangkuban sa tanang emergency responders gikan sa mga sitio, barangay, munisipyo ug syudad sa tibuok Bukidnon.
Ang tumong sa Provincial Olympics mao ang pagbansay sa mga responders sa koordinasyon, kahibalo, ug kahimtang sa pagbantay sa kaluwasan hilabi na sa panahon sa sunog ug uban pang katalagman.