Nagpadayon ang mga otoridad sa imbestigasyon kabahin sa CCTV footage nga mikatap sa social media diin makita ang tulo ka batan-ong sakay sa motorsiklo nga gihunong ang usa ka lalaking naglakaw ug kalit kini gisumbag. Ang insidente nahitabo sa Freedom Park, Barangay 4, syudad sa Malaybalay, niadtong milabayng adlaw.
Gipasabot ni Malaybalay City Mayor Jay Warren Pabillaran nga base sa inisyal nga imbestigasyon sa kapulisan, personal nga panagbangi ang hinungdan sa maong hitabo ug wala kini kalambigitan sa mas halapad nga hulga sa seguridad sa dakbayan. Nagpadayon karon ang kapulisan sa ilang paningkamot aron matabangan ang biktima ug masiguro ang hustisya.
Gisugdan na usab ang proseso sa barangay conciliation, samtang padayon ang koleksyon sa ebidensya aron mapaligon ang kaso. Gipasabot usab sa bagong napiling konsehal nga si Jason “Chad” Ayala nga naggahin siya og ₱20,000 nga reward alang sa bisan kinsang makahatag og kasayuran o makatudlo sa tulo ka batan-on nga nalambigit sa insidente. Gihangyo sa mga otoridad ang publiko nga musalig sa proseso sa imbestigasyon ug likayan ang pagpakatag og impormasyon nga makapadugang og tensyon, samtang ilang gipadayon ang pagsiguro sa kalinaw ug kahapsay sa syudad.