Subling mipaspas og 1.8% ang inflation rate o pagsaka sa presyo sa mga nag-unang palaliton ug serbisyo sa nasud niadtong Disyembre, base sa datos sa Philippine Statistics Authority kon (PSA).
Sumala sa PSA, mas paspas kini tandi sa 1.5% porsyento nga natala niadtong Nobiyembre 2025 apan mas hinay gihapon tandi 2.9% niadtong Disyembre 2024.
Sa usa ka pamayag, gisulti ni PSA Undersecretary ug National Statistician Dennis Mapa nga ang hinungdan sa maong pagpas-pas sa inflation sa miaging bulan mao ang pagsaka sa presyo sa mga pagkaon, ilabi na ang mga utanon ug produktong harina nga kasagarang gigamit sa pagkaon atol sa holiday season sa Disyembre.
Naapektuhan usab kini sa mga kusog nga bagyo nga miigo sa nasud niadtong Nobiyembre, nga nakaapekto sa suplay sa mga utanon ilabi na sa mga probinsya gawas sa National Capital Region.