Misaka sa 2.4% ang inflation rate sa nasod niadtong Pebrero 2026, sumala sa datos sa Philippine Statistics Authority (PSA).
Kini ang pinakapaspas nga pagsaka sa presyo sulod sa 13 ka bulan, mas taas kaysa 2.0% niadtong Enero 2026 ug 2.1% niadtong Pebrero 2025.
Sumala sa PSA, ang dakong nakaambag sa pagsaka mao ang mas mahal nga pagkaon ug non-alcoholic beverages, nga adunay 29.5% nga bahin sa kinatibuk-ang inflation.
Misaka usab ang presyo sa puy-anan ug kuryente/tubig, kan-anan ug accommodation services, kalingawan, sports ug kultura, ug panglawas.
Ang core inflation (dili apil ang piling pagkaon ug enerhiya) miabot sa 2.9%, mas taas kaysa 2.8% niadtong Enero.
Ang food inflation misaka sa 1.6% gikan sa 0.7% sa miaging bulan, apan mas ubos kaysa 2.6% niadtong Pebrero 2025.
Mitaas ang presyo sa bugas, mais, harina, isda ug seafood, gatas ug dairy products, prutas, nuts, ug utanon.
Apan niubos ang presyo sa mantika ug ready-made nga pagkaon.
Ang transport sector nagpakita og -0.3% nga pagkunhod sa presyo sa tinuig nga sukod.
Bisan pa niini, matod ni National Statistician Claire Dennis Mapa, posible nga mosaka pag-usab ang pamasahe ug transport inflation sa Marso tungod sa tensyon sa Middle East nga nakaapekto sa presyo sa lana sa kalibutan.
Niadtong Marso 3, 2026, nagpatuman na og price hike ang Department of Energy (DOE).
Ang pagsaka sa presyo sa lana nalambigit sa pagsira sa Strait of Hormuz, usa ka importante nga agianan sa mga barko, ug sa US-Israeli airstrikes nga nakapalala sa tensyon sa rehiyon.