Gipasiugda ni Bukidnon Governor Rogelio Neil “Oneil” P. Roque ang usa ka inclusive ug mas halangdong pagsaulog sa Kaamulan Festival 2026 atol sa opening karong adlawa, Marso 19, 2026.
Matud sa Gobernador, ang Kaamulan dili lamang pagpasidungog sa kasaysayan, kultura, ug katawhan sa Bukidnon, apan usa usab ka oportunidad aron malakip ug makigduyog ang mga lokal ug internasyonal nga bisita sa maong selebrasyon.
Gipasigarbo ni Governor Roque, ang kanindot ug bili sa mga kagamitan sa kultura nga gigamit sa Kaamulan sama sa bangkaw, taming, ug uban pang tradisyonal nga armas ug himan nga kaniadto gigamit sa lumad sa Bukidnon.
Dugang pa niini, ang Kaamulan Festival karong tuiga nagpakita sa mas halapad nga selebrasyon ug nagpasalig kini nga mapalambo ang kultura sa Bukidnon sa tibuok kalibutan.
Ang selebrasyon naghiusa sa pito ka lumad nga tribu sa Bukidnon: Bukidnon, Higaonon, Talaandig, Manobo, Matigsalug, Tigwahanon, ug Umayamnon, nga nagtinabangay sa pagpreserba ug pagpasundayag sa kultura ug tradisyon.
Gisiguro usab ni Governor Roque, nga hapsay ug luwas ang tibuok selebrasyon pinaagi sa hugot nga koordinasyon sa mga law enforcement personnel, aron masiguro nga luwas ang mga partisipante, mga lumad, ug bisita sa pagsaulog sa Kaamulan Festival 2026.