Gipadayag sa Traffic Operations ning dakbayan sa Malaybalay nga dili pa tunhay mapatuman ang 20 km/h speed limit sa dakbayan sa Malaybalay tungod sa kakulang sa permanenteng signages ug gitun-an pa ang pag-amendar sa ordinansa.
Sa pakighinabi sa Bombo Radyo Malaybalay kay Traffic Operations Officer II Lymrick C. Oro , gibutyag niini nga ang speed limit nga 20 km/h nakatakda ubos sa City Ordinance 900, partikular sa mga eskwelahan, simbahan ug ubang lugar nga daghan ug tawo.
Gipasabot niya nga nagpahigayon pa lamang ang Traffic Management Center og drive-run ug information drive, mahitungod sa daghan silang nadawat nga reklamo nga “sobra kahinay” ang limitasyon
Gidugang ni Oro nga sa pagpulong sa City Peace and Order Council (CIPOC), giusisa ang posibilidad nga bag-uhon sa Sangguniang Panlungsod ang kasamtangang speed limit human masuta nga daghan ang nagasupak sa 20 km/h standard.
Gipasabot usab sa opisyal nga ang labing dakong rason sa pagpahamtang sa speed limit mao ang pagpakunhod sa aksidente, kay kadaghanan sa natala nga disgrasya naglakip sa reckless driving ug kusog nga dagan. Apan hangtod wala pa matukod ang kompletong signages, dili pa kini mapatuman sa siyudad.