Gipahumdum ni Lanao del Sur 1st District Representative Zia Alonto Adiong nga ang bisan unsang lakang alang sa impeachment kinahanglang adunay lig-on nga basehan ubos sa Konstitusyon ug dili lamang bunga sa kabanha o init nga dagan sa politika.
Sumala ni Rep. Adiong, ang impeachment usa ka seryoso ug sagradong proseso nga dili angay dula-dulaan o gamiton isip hinagiban batok sa mga kaatbang sa politika. Gipasiugdahan niya nga sa dili pa mopasaka og ingon niini nga reklamo, kinahanglan nga klaro ang mga ebidensya ug nakatutok kini sa mga kalapasan nga giila sa balaod, imbes nga magpalutaw lang og mga isyu aron makamugna og kasamok sa publiko.
Dugang pa sa mambabalaod, mas mapuslanon alang sa nasod kung igahin sa Kongreso ang ilang panahon ug kusog sa paghimo og mga balaod nga makasulbad sa tinuod nga problema sa mga lungsoranon, sama sa kawad-on ug ang pagpalambo sa ekonomiya.
Gitapos ni Adiong ang iyang pamahayag pinaagi sa pag-ingon nga ang pagrespeto sa saktong proseso mao ang yawe aron mapabilin ang integridad sa gobyerno ug malikayan ang pag-usik sa oras sa mga butang nga wala’y igong basehanan.