Gipasalig sa house committee on justice nga dili mahimong babag ang nagpadayong impeachment proceedings batok ni Bise Presidente Sara Duterte sa pagtubag sa Kamara sa mga nasudnong krisis.
Matud pa ni House Committee on Justice Vice Chairperson Rep. Ysabel Zamora, padayon nga gihimo sa Kongreso ang mandato niini luyo sa mga hagit sama sa krisis sa enerhiya sa nasud.
Gibutayag usab sa magbabalaod nga duna kini gisunod nga constitutional timeline nga 60 ka session days aron humanon ang pagdungog, hinungdan nga dili mahimong hunongon ang proseso.
Matud pa niini, samtang nagpadayon ang kaso sa komite, ang ubang mga departamento ug komite sa gobyerno padayon usab sa tagsa-tagsa ka mga katungdanan.
Padayon ang pagdungog sa impeachment proceedings bisan kon naka-recess ang Kongreso gikan sa Marso 21 hangtod sa Mayo 3, human gihatagan og awtoridad sa plenaryo ang komite nga mopadayon sa ilang trabaho.
Gipadayag usab ni Rep. Zamora nga walay babag ang mga petisyon nga giduso sa Korte Suprema sa padayon nga pagsusi sa mga ebidensya ug testimonya.
Sa pagkakaron, anaa na sa hearing proper ang komite aron sayron kon duna ba’y probable cause ang duha ka nahabiling reklamo sa impeachment batok sa Bise Presidente.