Sumala ni Senate President Pro Tempore Panfilo “Ping” Lacson, aduna usab giingong pundo o “allocable fund” si Senadora Imee Marcos nga mobalor og dili moubos sa P2.5 bilyon ngadto sa P3.5 bilyon ubos sa 2025 national budget.
Kini ang gipadayag ni Lacson dungan sa iyang pagpangutana sa moralidad sa senadora sa pagbatikos sa 2026 budget. Matod ni Lacson, base sa iyang nakuha nga impormasyon gikan sa gitawag nga “Cabral files,” nalakip ang ngalan ni Senadora Imee sa mga opisyal nga adunay gigahin nga pundo ubos sa National Expenditure Program (NEP).
Gisaway ni Lacson ang senadora tungod sa pagsige niini og “reklamo” ug pagtawag sa 2026 budget nga puno og “soft pork” o “giniling,” samtang siya mismo giingong adunay susamang pundo sa miaging budget. Matod pa sa senador, kung ang basehan mao ang depinisyon ni Marcos sa “pork barrel,” mapasangil usab kini ngadto sa senadora mismo.
Dugang pa ni Lacson, ang maong pundo nga anaa sa “Cabral files” – nga giingong gimugna ni kanhi DPWH Undersecretary Maria Catalina Cabral – nagpakita og mga “placeholder” o gahin nga pundo nga idirekta sa mga distrito o proyekto sa mga pinili nga opisyal.
Gawas kang Senadora Marcos, gihinganlan usab ni Lacson ang pipila ka mga miyembro sa Gabinete nga giingong adunay bilyon-bilyon nga “allocables,” butang nga giingon sa senador nga angay lamang unta alang sa mga magbabalaod ug dili sa mga ehekutibong opisyal.