Nanawagan og dinaliang imbestigasyon si Marikina Rep. Stella Quimbo kalabot sa nagkagrabe nga cigarette smuggling sa nasud human makompiska ang binilyon ka pesos nga kantidad sa ilegal nga sigarilyo niadtong pagsugod sa tuig.
Giduso ni Quimbo, kinsa maoy nangulo sa House Committee on Appropriations, ang usa ka resolusyon aron susihon ang epekto niini sa ekonomiya ug sa panglawas sa katawhan. Base sa taho, nakuha sa Philippine National Police (PNP) niadtong Enero 1 ang 32 ka mga trak nga adunay karga nga smuggled nga sigarilyo nga mubalor og ₱2.6 bilyones.
Matud sa magbabalaod, dako kini nga kawad-an sa panudlanan sa gobyerno tungod kay mukabat sa ₱875.1 milyones nga buhis ang wala makolekta base sa 2026 tax rate. Gikabalak-an nga kon dili kini mapugngan, maapektuhan ang pondo alang sa mga programa sa panglawas sama sa PhilHealth.
Tumong sa maong lakang nga palig-onon ang koordinasyon sa mga ahensya sa gobyerno ug pahugtan ang mga silot batok sa mga smugglers aron maprotektahan ang mga lehitimong negosyante sa nasud.